Xuliyo Kartal: Yosh qizning kundaligi

Xuliyo Kartalning ushbu kitobida o‘tayotgan umrning har lahzalaridan zavqlanadigan va hayotdagi har bir voqea-hodisada sir, joziba, hikmat mujassamligini ko‘ra biladigan taʼsirchan qalbli insonning mahzun kechinmalari, o‘yga toldiruvchi mulohazalari bitilgan. Unda badiiy asarlardagi singari syujet chizig‘i, bir-biri bilan mojarolashgan qahramonlar obrazi ko‘rinmaydi. Mazkur kitobda ko‘ngilda kechgan o‘ylar bayon qilinadi, xolos. Kitobning bosh qahramoni — muallifning o‘zi. Muallif — uning asosiy va birdan-bir qahramoni. Lekin ana shu yakka, yagona qahramon o‘ylari, kechinmalari, hayot va inson umri haqidagi mulohazalari kishini ko‘p masalalar xususida o‘ylab ko‘rishga, mushohada yuritishga undaydi. Kundalik daftar aslida inson hayoti, ruhiy kechinma, quvonch va iztiroblari aks etgan birgina shaxsga tegishli bo‘lgan qaydlar. Ammo shunday kundaliklar borki, bir insonning umr yo‘li butun bir davr farzandlari uchun hayot saboni bo‘lishi mumkin. Mazkur kundalik ham sizni befarq qoldirmaydi. Qahramonning dard va shodliklariga sherik bo‘lasiz. Mutolaa jarayonida o‘zingiz uchun ibrat olishingizga umid qilamiz.